По благословению Высокопреосвященнейшего митрополита
Полтавского и Миргородского Филиппа
 
Язык сайта        Українська        Русский   

Служба Пресвятой Богородице пред чудотворной Ея иконой Горбаневской

На велицей вечерни

Поем Блажен муж.

На Господи, воззвах стихир 8, глас 1. Подобен: О, дивное чудо:

О, велие чудо!* на месте необитаемом благодать Божия спасительная изливается*, и честный образ Богоматере знаменьми исцелений дивно прославляется*. Веселися, граде Полтаво,* радуйтеся, людие Христоименитии*, возопиим верно* Царице Богоизбранней Богоотроковице*: Благодатная, радуйся*, с Тобою Господь*, подаяй мирови* Тобою велию милость. (трижды)

Дивны Твоя тайны, Богородице*, яко залог любве к роду христианскому* дарствуеши священную икону Твою* небесной благодати исполненну*. Слава Твоя благолепная богодарованными сияет чудесы*; свыше бо призираеши на нас, Владычице*, и милостию Своею грешныя покрываеши*; Благодатная, радуйся*, с Тобою Господь*, подаяй мирови* Тобою велию милость. (дважды)

Чертог зрим украшенный храм Твой, Богородице,* в немже непрестанно покланяемся* живоносному образу Твоему*, радуемся, земнороднии*, о Божественней славе Твоей красящеся*, чаем милости Твоя богатыя*, и благодарственная пения воспеваем*: Благодатная, радуйся*, с Тобою Господь*, подаяй мирови* Тобою велию милость. (дважды)

Слава, глас 2. Подобен: Киими похвальными

Киими похвальными венцы украсим пресветлый праздник Владычицы нашея, украсившия храм сей чудотворным образом Своим: се Царица Богоотроковица прииде. Той достойную честь воздати немощно: сей есть дар многоценный Заступницы мира. Недоразумеваемая и непостижная днесь содеваются Тобою и страшная таинства, о Владычице Богоблагодатная: се море чудес неисчерпаемое, и врачевание безмездное страждущим душами и телесы. Темже вопием Ти: Радуйся, Радосте наша, избави нас от всякаго зла, Радуйся, всех Упование, Владычице.

И ныне, глас 6:

Приидите, празднолюбных собори, Пресвятую Деву Богоотроковицу ублажим, радости бо и спасения Ходатаица бысть мирови, яко рождшая Христа Бога. Сию бо Отец Пребезначальный от всех родов Едину избранную Дщерь Себе именова; Сын Собезначальный и Соприсносущный в Матерь избра; Дух же Святый яко Пречистую Невесту Себе боголепно сочета. Сию, яко Богоизбранную и благословенную в женах, вышния силы немолчными песньми величают, Гавриила имущи чиноначальника: Благодатная, радуйся, с Тобою Господь. Сию патриарси, пророцы и вси святии с Давидом благоглаголивым радостными гласы воспевают: Предста Царица одесную Тебе, Владыко, рясны златыми одеяна и преукрашена Божественными благолепотами. Сию, яко державную Заступницу рода нашего и мы, недостойнии, воспоим: Радуйся, Церкве чудное украшение и всему миру предивный покрове; радуйся, верным людем пособие во бранех и воином крепосте: радуйся, покрове, похвало и радосте всех земнородных; радуйся, Божественное утешение всех скорбящих и обидимых; радуйся, обрадованная, с Тобою Господь, подаяй мирови Тобою велию милость.

(Или Богородичен догмат втораго гласа, Прейде сень законная).

Вход. Прокимен дне и чтения три:

Бытия чтение:

Изыде Иаков от студенца клятвеннаго, и иде в Харрань, и обрете место, и спа тамо, зайде бо солнце. И взят от камения места того, и положи возглавие себе, и спа на месте оном. И сон виде: и се лествица утверждена на земли, еяже глава досязаше до небес, и Ангели Божии восхождаху и низхождаху по ней: Господь же утверждашеся на ней, и рече: Аз Бог Авраамов отца твоего, и Бог Исааков, не бойся. Земля, идеже ты спиши на ней, тебе дам ю, и семени твоему. И будет семя твое яко песок земный, и распространится на море, и ливу, и север, и на востоки: и возблагословятся о тебе вся колена земная, и о семени твоем. И се Аз с тобою сохраняяй тя на всяком пути, аможе аще пойдеши. И возвращу тя в землю сию: яко не имам тебе оставити, дондеже сотворити ми вся, елика глаголах тебе. И воста Иаков от сна своего, и рече яко есть Господь на месте сем, аз же не ведех. И убояся, и рече: яко страшно место сие; несть сие, но Дом Божий, и сия врата небесная.

Пророчества Иезекиилева чтение:

Тако глаголет Господь: будет от дне осмаго: и прочее. Сотворят иерее на олтари всесожжения ваша, и яже спасения вашего: и прииму вы, глаголет Адонаи Господь. И обрати мя на путь врат святых внешних, зрящих на востоки, и сия бяху затворена. И рече Господь ко мне: врата сия затворена будут, и не отверзутся: и никтоже пройдет сквозе их, яко Господь Бог Израилев пройдет ими, и будут затворена. Яко Игумен сядет в них снести хлеб. По пути еламских врат внидет, и по пути Его изыдет. И введе мя по пути врат святых, сущих к северу, прямо храму: и видех, и се исполнь славы храм Господень.

Притчей чтение:

Премудрость созда Себе дом, и утверди столпов седмь. Закла Своя жертвенная, и раствори в чаши Своей вино, и уготова Свою трапезу. Посла Своя рабы, созывающи с высоким проповеданием на чашу, глаголющи: иже есть безумен, да уклонится ко Мне. И требующим ума рече: приидите, ядите Мой хлеб, и пийте вино, яже растворих вам. Оставите безумие, и живи будете: и взыщите разума, да поживете, и исправите разум в ведении. Наказуяй злыя, приимет себе безчестие: обличаяй же нечестиваго, опорочит себе: обличение бо нечестивому, раны ему. Не обличай злых, да не возненавидят тебе. Обличай премудра, и возлюбит тя. Даждь премудрому вину, и премудрший будет. Сказуй праведному, и приложит приимати. Начало премудрости страх Господень: и совет святых разум. Разумети бо закон, помысла есть благаго: сим бо образом многое поживеши время, и приложатся тебе лета живота.

На литии стихиры, глас 8:

Предстательнице верных, Богородительнице, скорбящих радосте и плачущих великое утешение, моли Сына Твоего, Христа Бога нашего, со Ангелы и Апостолы и всеми святыми, избавити нас, в час испытания, лютаго осуждения, да Тобою спасение улучивше, во веки славим Тя, Преблагословенная.

Верою притекаю к покрову Твоему, Богородительнице Пречистая: от напастей и бед, и страстей томления, и бесовскаго озлобления спаси мя, яко милости имущи пучину, и спасения явльшися Ходатаица, Владычице, Яже Бога рождши Милостиваго, Единаго Всещедраго и Многоблагоутробнаго.

Слава, глас тойже:

В день праздника нашего вострубим трубою песней: торжествуй, соборный храме, имеяй Державную Помошницу в скорбех многомятежнаго жития нашего, и крепкое заступление в напастех, незримую Наставницу ко спасению, о всем мире Молитвенницу теплую.

И ныне:

О, Госпоже, Царице и Владычице, умиленною душею смиренно молим Тя: приклони ухо Твое к молению грешных рабов Твоих, Тя призывающих, и сподоби нас райских селений причастники быти, да безконечно славим Тя, Едину Чистую и Препрославленную.

Тропарь, глас 4:

Заступнице и Похвало земли нашея Полтавския, Пречистая Дево Богоневесто Владычице! Многообразную благодать от святыя Твоея иконы стяжавше, молим Тя, смирении и грешнии: о, Всепетая Мати Бога нашего, Молитвеннице теплая, чудес и исцелений подательнице, не отвратися тока слез наших, но приими моления рабов Твоих; не ввери нас человеческому предстательству, да не до конца погибнем от беззаконий наших, но покрый нас всечестным покровом Твоим, и изми ны от належащих на нас бед и скорбей; моли Сына Твоего, Христа Бога нашего, грехов оставление нам даровати, и жизни вечныя причастники быти сотвори; на Тя бо по Бозе все упование наше возлагаем, Пресвятая Дево.

Ин тропарь, тогожде гласа:

Заступнице Усердная, Мати Господа Вышняго, за всех молиши Сына Твоего, Христа Бога нашего, и всем твориши спастися, в державный Твой покров прибегающим; всех нас заступи, о, Госпоже Царице и Владычице, же в напастех, и скорбех, и болезнех, обремененных грехи многими, предстоящих и молящихся Тебе умиленною душею и сокрушенным сердцем пред Пречистым Твоим образом со слезами, и невозвратно надежду имущих на Тя, избавление всех зол, всем полезная даруй, и вся спаси, Богородице Дево, Ты бо еси Божественный покров рабом Твоим.

На стиховне стихиры, глас 2:

Яко всех вышшу сущую небесных и земных, Херувим славнейшую, и всея твари честнейшую, Тебе, Заступницу и покров Христианскому роду Христос дарова, покрывати и спасати люди согрешившия, к Тебе прибегающия; темже, Прибежище всех, Тебе воспеваем, Владычице, Обрадованная Радосте всех, и честный и благознаменитый твой праздник празднуем светло, Христа моляще даровати нам Тобою велию милость.

Глас 5:

Стих: Слыши, Дщи, и виждь, и приклони ухо Твое.

Воспоим, людие, светло Давидскую песнь Отроковице Богоневесте, Матери всех Царя Христа: предста Царица одесную Тебе, Владыко, рясны златыми одеяна и преукрашена Божественными лепотами. Сию бо, избранную в женах паче всего мира удобрив, благоизволи Бог родитися из Нея, великия ради Своея милости.

Стих: Лицу Твоему помолятся богатии людстии.

Воспоим, людие, светло Давидскую песнь Отроковице Богоневесте, Матери всех Царя Христа: предста Царица одесную Тебе, Владыко, рясны златыми одеяна и преукрашена Божественными лепотами. Сию бо, избранную в женах, благоизволи Бог Помощницу людем Своим даровати, строити и покрывати от всех бед рабы Своя, Едину благословенную.

Слава, И ныне, глас тойже:

Храм и дверь еси, Палата и Престол Царев, Дево Всечестная, Еюже Избавитель Мой, Христос Господь, во тьме спящим явися, Солнце Сый правды, просветити хотя яже созда по Образу Своему рукою Своею. Темже, Всепетая, яко Матернее дерзновение к Нему стяжавшая, непрестанно моли спастися душам нашим.

На утрени

Бог Господь, глас 4, и тропарь иконе, Заступнице и Похвало, дважды; Слава, и ныне: ин тропарь, Заступнице Усердная.

По первом стихословии седален, глас 5:

Утоли болезни многовоздыхающия души моея, утолившая всяку слезу от лица земли: Ты бо человеков болезни отгониши, и грешных скорби разрушаеши. Тебе бо вси стяжахом надежду и утверждение, Пресвятая Мати Дево.

Слава, и ныне, тойже

По втором стихословии седален, глас 6:

Упование мира, Благая Богородительнице Дево, Твое и единое страшное предстательство просим: умилосердися на люди безпомощныя, и моли Милостиваго Бога избавитися душам нашим от всякаго прещения, Едина Благословенная.

Слава, и ныне, тойже.

Полиелей. Величание:

Величаем Тя, Пресвятая Дево, и чтим образ Твой святый, егоже во утешение людем Твоим и земли Полтавстей явила еси.

И псалом избранный.

По полиелеи седален, глас 1:

Девического Твоего чрева красен клас явлься, израстила бо еси мирови жизнь. Сего ради силы небесныя вопиют Тебе, Богородице, славяще честное Твое празднество, Пречистая: слава девству Твоему, слава образу Твоему, Мати безневестная.

Слава, и ныне: Тойже.

Степенна: 1 антифон 4 гласа: От юности моея.

Прокимен, глас 4: Помяну имя Твое* во всяком роде и роде.

Стих: Лицу Твоему помолятся богатии людстии.

Евангелие: Луки, зачало 4.

Псалом 50. Слава: Молитвами Богородицы. И ныне: Молитвами Богородицы. Помилуй мя, Боже.

И стихира, глас 6:

Днесь благодать Святаго Духа нас собра во священное жилище; под кров Твой, Богородице, прибегающе, верою молим Тя, Помощница всем благонадежная, соблюдай и покрывай нас чрез все житие, даруй нам светом Твоим ходити, огненныя стрелы врага угаси, в час смертный предстани и сподоби нас улучити Царствие Сына Твоего, да вси Архангельский глас восприимше, рцем: Марие, Господь с Тобою; радуйся, Благословенная в женах, яко Спаса родила еси душ наших.

Канон, глас 4.

Песнь 1.

Ирмос: Отверзу уста моя, и наполнятся Духа, и слово отрыгну Царице Матери, и явлюся светло торжествуя, и воспою радуяся Тоя чудеса.

Ангел вопияше Тебе, Дево Чистая: Радуйся; мы же что Ти принесем, Благаго Царя Благая Мати? Явила бо еси нам в сия последняя времена сокровище неоскудное – чудотворную икону Твою – во освящение и исцеление душ наших.

Ты буди нам утверждение и в бедах скорое заступление, Царице небесе и земли, на Тебе надеемся, непрестанно моляще Твою благостыню.

Яко страждущим скоро являла еси Твою благодать, не отступай, Пречистая Дево, утешением Твоим, и от нас, в бедах и злоключениях сущих, да Тя присно величаем.

Яже Бога Слова человеком преславным Твоим рождеством соединившая, Дево Богоневесто, утоли церковныя соблазны, и подаждь мир вселенней, яко Благая.

Песнь 3.

Ирмос: Твоя песнословцы, Богородице, живый и независтный Источниче, лик себе совокупльшия духовно утверди, в Божественней Твоей славе венцев славы сподоби.

Богатство духовное неисчерпаемое даровала еси рабом Твоим, икону Твою священную, еяже прославление светло празднующе, вернии, избавляемся от всяких скорбных обстояний, о Пренепорочная Дево, Жизнь всех – Христа – рождшая.

Святая Владычице Чистая, Бога нашего Мати, всех Творца неизреченно рождшая, моли всегда благость Его страстей нас избавити и оставление нам подати грехов.

Не оскудевай, Пренепорочная Дево, молитвами Твоими, и сохрани стадо Твое, еже собрати благоволила еси, Мати Пастыреначальника Господа Иисуса Христа, да ни едина погибнет от овец Твоих.

Положи Тя Бог пристанище сущим в бедах, Чистая, от Тебе благоволивый восприяти плоть; темже Ти припадающе взываем: даруй помощь Твою рабом Твоим.

Таже седален, глас 8:

Риторов глаголы не довлеют воспети по достоянию, о Мати Бога нашего, дивная чудеса и неисчислимыя благодеяния Твоя, от иконы сея являемыя; мы же, во смирении сердца тайно вещаем Ти, Ангелов честнейшей: Радуйся, благодатная, пребуди, Милосердная, с нами неотступно во веки.

Слава, и ныне, глас 4:

Церковь Твоя светло празднует Твоего славнаго образа явление, и вси поюще зовем Ти прилежно: вся верныя укрепи на вражию силу, и советы беззаконных разори, и житие наше направи творити Божественную волю Сына Твоего.

Песнь 4.

Ирмос: Седяй в славе, на Престоле Божества, во облаце легце прииде Иисус Пребожественный, нетленною дланию, и спасе зовущия: Слава, Христе, силе Твоей.

Кий ум постигнути возможет силу благодатных исцелений, исходящую от лика Твоего святаго, в Божественнем сем храме пребывающаго? Избави же нас бесовския прелести, озлобления же и вреда, и искушения, да верою Тя славим, сущую по Бозе Заступницу и Покров наш.

Озари, всепетая Дево, разумом истиннаго боговедения помраченный ум наш, да не погибнем люте во гресех наших; помыслами благочестия сердца наша просвети, да, спасении Тобою с радостию воспоим: слава силе, слава и милосердию Твоему, Господи, Благодателю Всеблагий.

Избавльшеся Тобою праматерния печали, Богородительнице, веселие всем рождшая и всемирную радость, утешения исполнени быхом; темже, Всепетая, Твоя песнословцы от бед Твоими молитвами соблюди.

Молим Тя, прежде век избранную в Матерь Вседержителя, стягни разслабленныя духом души наша, оживи росою покаяния сердечнаго и молитвы слезной; утверди в сердцах рабов Твоих веру истинную и любовь нелицемерную, да сподобимся подвигом добрым подвизатися, веру непорочну соблюсти, житие мирно скончати, хвалебно Господеви поя: слава долготерпению Твоему, Спасе наш!

Песнь 5.

Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога, и родила еси Безлетнаго Сына, всем воспевающим Тя мир подавающая.

Ни ум Ангельский, ниже язык человеческий возможет изрещи множества знамений дивныя помощи Твоея, Пренепорочная Владычице, роду человеческому в нуждах душевных и телесных, благодеяния Твоя паче звезд небесных сияют во всем мире Твоем; приими убо благодарения сия недостойная, о Дево Богоневестная, непрестанно славимая Горними Силами.

Коль чудны дела Твоя, Господи! се бо яко солнце мирови возсия пречестная икона Преблагословенныя Матере Твоея, верных мысли просвещающи, Тя, Христе, величающих присно.

Сей святый день радостный, Богомудреннии, приидите, песньми и пении духовными празднуем светло, ныне всеблаголепно зряще храм Пречистыя, иконою световидно украшаемь, яко пребывание славы Приснодевы зде явися; молимся Ти прилежно, яко сущей с нами, Богородительнице, во еже благодатию Твоею озаритися нам.

Ныне небо и земля веселится, и чини Ангелов и человеков собрание изрядно празднующе, воспоим Христа, даровавшаго нам Божественное наслаждение – образ Свой священный и Пречистыя Матере Своея.

Песнь 6.

Ирмос: Божественное сие и всечестное совершающе празднество, богомудрии Богоматере, приидите, руками восплещим, от Нея рождшагося Бога славим.

Достойно есть величати Тя, Богородицу, даровавшую нам пречестный образ Свой в помощь и заступление Божественное граду сему от враг видимых и невидимых.

Достойно есть величати Тя, яже в вышних Престолу Живоначальныя Троицы предстоящую, от Ангел воспеваемую Деву Пречистую, и от земных яко Богоневестную Матерь присно прославляемую.

Величаем Тя, Пресвятая Дево, и почитаем светоносный образ Твой, егоже во утверждение граду Полтаве положила еси, да пребудет в нем вера Православная и благочестие от ныне и до века.

Во всю землю нашу возсия свыше данный благочестно покланяемый образ Твой, Богоизбранная Отроковице, и Божественною благодатию покрывается храм сей, верно Бога прославляющий.

Кондак, глас 8:

Светоносная палата уготовася Тебе, Владычице, святый Соборный храм града нашего, в немже всечестная икона Твоя, якоже солнце светозарное возсия. Ты же, Чистая, благодарения наша и поклонения иконе Твоей приемлюще, не отвергай нас, призывающих Тя с верою и умилением. Озари души наша светом благодати Твоея, да никтоже из притекающих к Тебе изыдет отсюду тощь и неуслышан. О, Богомати, милости Источниче, управи пути жития нашего и советы наша в правде, во еже открытися в них Царствию Христову; Ты бо еси Молитвенница усердная о граде нашем, и земли нашея Похвала и Покров.

(Или сей: Не имамы иныя помощи, не имамы иныя надежды разве Тебе, Владычице, Ты нам помози: на Тебе надеемся, и Тобою хвалимся: Твои бо есмы раби, да не постыдимся.)

Икос:

Высоту небеснаго жития и славы присносущныя Божественное осияние даруй рабом Твоим, любоблагоутробная Мати Дево Марие, и сподоби совершити преславное торжество во свете добродетелей и помышлений, духовно сияющих; свыше бо облагодатствовала еси живоносный образ Твой, Богоизбранная Невесто, и яко лучами солнечными и чудесными знамениями согреваеши сердца благочестно почитающих и верою покланяющихся, якоже Тебе Самой, сущей с нами, святей иконе Твоей, юже со страхом окружают от небес Ангели святии; сия убо икона, якоже луна пресветлая в нощи отгонит тму болезней и скорбей от всех, иже желанием сердечным умиленно притекают ко благосердию Твоему, и, радующеся о Божественней благодати, величают Тя, зовуще: Радуйся, предстательство Христиан непостыдное и храма соборнаго красото и радование.

Песнь 7.

Ирмос: Не послужиша твари богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог благословен еси.

Да сликовствует церковней светлости любовию Божественною Ангельское воинство, Богомудренно воспевающее: благословен еси в храме славы Твоея, Господи.

Паче вышних ликостояний вознеслася еси, Всечистая, Едина сущи Мати Вседетеля; темже радующеся взываем: Благословенна Ты в женах еси, Всенепорочная Владычице.

Церковь земнородных торжествующи радуется, зрящи Божественною лепотою украшенную икону Матери Господней, и единомудренно воспевает: благословенна еси, Владычице, просвети нас светом Сына Твоего.

Почесть и поклонение приносящи Тебе, Дево Чистая, Девственная Похвало, о Тебе радуется, Благодатная, всякая тварь, Ангельский собор и человеческий род, достойно взывающи: Благословенна еси, Владычице, Дево Неискусобрачная.

Песнь 8.

Ирмос: Отроки благочестивыя в пещи, Рождество Богородичо спасло есть. Тогда убо образуемое, ныне же действуемое, вселенную всю воздвизает пети Тебе: Господа пойте дела, и превозносите во вся веки.

Лучами Света умнаго освещаем Божественный Дом Твой, осеняет ныне всех облаком Духа Святаго, и освящает верныя, согласно поющия: благословите вся дела Господня, Господа.

Честь и славу стяжавший священнописанный образ Богородицы и Предвечнаго Младенца Христа Жизнодавца лобызающе, со благоговением притецем, вернии, воспевающе: благословите вся дела Господня, Господа.

Умиленно просим Тя, Владычице, освяти Божественною благодатию нас молящихся, и ополчением непобедимых Ангел Божиих огради град сей, врагов свирепство покаряющи, да благословим Господа во веки.

Священное изображение умиленно лобзающе Божественнаго Младенца Христа и Пречистыя Его Матере, молимся: сподоби нас, Христе Спасе, Воскресение жизни улучити, вопиющих: благословен еси, Господи, во веки.

И поем Честнейшую.

Песнь 9.

Ирмос: Всяк земнородный да взыграется духом просвещаемь, да торжествует же Безплотных Умов естество, почитающее священное торжество Богоматере, и да вопиет: радуйся всеблаженная Богородице, Чистая Приснодево.

Богоначальным мановением святая икона Твоя, Владычице, от лет древних хранимая, ныне явися яко чаша, благодать обильно изливающая, во ограждение града сего от зла. Темже с верою сердечною прославляюще Тя, Богородице, благодарственно величаем.

Юже изволил еси, Владыко, приими милостивно Молитвенницу о нас, Матерь твою, и Твоея благости всяческая исполнятся; да Тя вси, яко Благодателя, величаем.

Из рода в род хранимая святыня, образ сей честный, молим Тя, Царице, да будет во освящение и исцеление душ и телес наших, да Тя во веки величаем.

Призри благосердием Твоим, Всепетая Дево, на люди Твоя, цельбоносному образу Твоему покланяющияся, яко Тебе Самой, на нем изображенной Матери Господней, и Предвечному Младенцу Твоему, Егоже любовию объяла еси на Пречистых руках Твоих, молящи сохранити град сей и люди невредимы, да Тя во веки веков величаем.

Светилен:

Под кров Твой, Дево Госпоже, прибегаем вси роди человечестии: просвети ны светом Рождества Твоего, грешнии раби Твои, молящияся прилежно и покланяющияся чудотворному образу Твоему, и просящия умирения мирови и душам нашим велия милости.

На хвалитех стихиры, глас 2:

Приидите, возрадуемся державней заступнице рода нашего Царице Богородице, приидите к тихому и чудному Ея покрову веселящеся; дарует бо верным обильныя дары целебныя от неистощимаго источника милости, и тьмы избавляет нас, искушений и бед и обстояний, всех благочестно прославляющих и чтущих Ю, яко всеблагословенную Матерь Христа Бога.

О, Владычице, приими милостивно моления наша, и спасай нас всегда, яко Благая и Милостивая; да, с веселием лобызаем Пресвятую икону Твою, и присно радующеся, восхваляем и величаем Тя, обрадованная Радосте верных раб Твоих.

Ины стихиры, глас тойже:

Радуйся, Палато Слова; радуйся, Невесто Неневестная; радуйся, Радосте наша; радуйся, Мати Живота, благословен Плод чрева Твоего.

Радуйся, всеблагословенная Марие, Мати Христова; радуйся, сущая Радосте всего мира; радуйся, всеблагая Христианом Помощнице; радуйся, обидимых Заступнице; радуйся, недугующим скорое и известное Прибежище.

Радуйся, сирым и вдовицам Божественное Утешение; радуйся, всех нищих Покрове и Питательнице; радуйся, всем сущим в бедах скорое Избавление; радуйся, Богоневесто Владычице, упование Христиан.

Радуйся, всех Христиан Надеждо и Покрове, Богомати всенепорочная, всея твари честнейшая, небесных и земных славнейшая: родила бо еси всех Творца и Бога.

Слава, и ныне: глас 6

Днесь собори верных сошедшеся, духовно да торжествуем, и Богоотроковицу Деву Богородицу песньми благохвальными ублажим, глаголюще: Радуйся, Едина избранная от всех родов в Матерь Предвечнаго Слова; Радуйся, вместилище невместимаго всеми; Радуйся, Ангелов и Серафимов радосте; Радуйся, пророков проповедание и похвало; Радуйся, Апостолов и святителей удобрение; Радуйся, мучеников крепосте и всех праведных славо; Радуйся, державный покрове верных; Радуйся, скорбящих Божественное утешение; Радуйся, в бедах и напастех скорое избавление; Радуйся, грешников всех прибежище и благая Заступнице; Радуйся, Благодатная и Обрадованная, с Тобою Господь, подаяй мирови Тобою велию милость.

Великое славословие.

Тропарь, ектении и отпуст.

На Литургии служба вся Богородицы.