По благословению Высокопреосвященнейшего митрополита
Полтавского и Миргородского Филиппа
 
Язык сайта        Українська        Русский   

Служба святителю Афанасию, Полтавскому

СЛУЖБА СВЯТИТЕЛЮ ПОЛТАВСКОМУ АФАНАСИЮ

Идеже есть мощи, и храм его, или аще изволит настоятель, творим бдение

НА МАЛЕЙ ВЕЧЕРНИ

На Господи воззвах стихиры, глас 2. Подобен: Доме Евфрафов

Дом Духа Святаго* сердце твое быть,* святителю отче* Афанасие преблаженнейший,** темже Дух Святый в тя вселися

В селениих Божественных* ныне ликовствуеши,* Афанасие божественный,* с вышних на люди твоя** призираяй милостивно

Вселися в Тя, отче,* Духа Святаго благодать,* Еяже причастницы* и нас сотвори** молитвами твоими, святе

Храму украшение* мощи твоя суть,* от нихже истекают* исцеления благодатная** верою тыя лобзающим

Слава, глас тойже. Самогласен:

Святителю преблаженнейший* отче чудотворче Афанасие, в житии твоем крест тяжкий понесый, и гонения претерпевый, и клеветою уязвлен быв, ныне власть имаши оскорбляемым помогати, скорбныя же утешати молитвами твоими, святе

На стиховне: Стихиры, глас 4. Подобен: Званный свыше

Званный свыше* к горнейшей славе* егда тьма клеветы* помрачи очи душевныя* и разума сотвори сетование* тогда небесный смысл возсиял есть* в души твоей, страдальче,* чистоту являяй твою,* темже познал еси Свет истинный,* Христа Бога нашего,* Егоже моли** спасти и просветити души наша

Стих: Священницы Твоя облекутся в правду

Призванный от Господа* в земнем житии ко страданию,* в небеснем же* ко славе вечнующей,* злых людей кротостию препобедив,* и во свете ныне ликуеши,* очима своима видящи* пребожественную красоту* тобою всем сердцем возлюбленнаго* Христа Бога нашего,* Егоже моли** спасти и просветити души наша

Стих: Преподобнии Твои радостию возрадуются

Звание Божественное звание внушив* от человек же скорби восприяв* и тьму печалей,* яже помрачи очи твоя,* к небесней светлости возшед,* и к Свету пресветлому* и вышшему всех сетлостей,* ныне чистыма очима* зриши светлый зрак* Христа Бога нашего,* Егоже моли** спасти и просветити души наша

Слава, глас 6. Самогласен:

Верный рабе и пастырю добрый,* святителю отче Афанасие,* греху прежде смерти умерев,* к жизни вечней воскресл еси, святе,* скорби же и клеветы претерпев,* ныне скорбных и обидимых имаши власть утешати,* и ко Спасу молитися** помиловатися душам нашим

Тропарь, глас глас 4:

Многоскорбный угодниче Христов, святителю отче наш Афанасие, в житии своем крест тяжкий понесый и многия гонения и клеветы претерпевый, не остави нас, чад твоих, твоим предстательством, имаши бо дерзновение ко Господу молитися, о еже всякия скорби нам претерпети достойно, ко спасению душ наших

НА ВЕЛИЦЕЙ ВЕЧЕРНИ:

На Господи, воззвах стихиры, глас 4. Подобен: Яко добля

Яко добраго пастыря* святителю Афанасие* сошедшеся днесь восхвалим тя,* яко течение совершив,* веру соблюл еси,* и прият от Бога по страдании твоем венец;* Егоже моли от бед избавитися* верою совершающим** всечестную память твою

Яко великоименнаго* и воскресению соименнаго* сошедшеся ныне, Афанасия восхвалим,* той бо море жития преплыв,* пристани небеснаго Царствия достиже,* и ныне молится усердно* о обителех Полтавских,* верою совершающих** всечестную память его

Яко святителя славна* и терпеливнаго страдальца,* сошедшеся днесь воспоим Афанасия,* чудес источника* и радости небесныя подателя;* Сей бо в добродетелех креплий быв,* силу с небесе подает* верою совершающим** всечестную память его

Яко безсмертию соименнаго* Афанасию блаженне,* притекше к мощем твоим цельбоносным,* восхвалаем тя, отче;* ты бо дерзновение имаши* ко Господу тепле молитися* о оставлении грехов* всем верою совершающим** всечестную память твою

Слава, глас 5. Подобен: Преподобне отче

Святителю отче, богоносе Афанасие* вельми подвизался еси в жизни временней,* в терпении скорбей и напастей,* образ пастве твоей быв;* ныне же ликуеши с безплотными,* Христа непрестанно славословя* со Отцем и Святым Духом,* Троицу Святую, Едино Божество.* Темже ти припадаем, святе:* Господеви помолися* даровати церкви единомыслие,** и душам нашим велию милость

Чтения три:

Премудрости Соломоновы чтение:

Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их. И еже от нас шествие сокрушение, они же суть в мире. Ибо пред лицем человеческим аще и муку приимут, упование их безсмертия исполнено. И вмале наказани бывше, великими благодетельствовани будут, яко Бог искуси их, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися нань, разумеют истину, и вернии в любви пребудут Ему: яко благодать и милость в преподобных Его, и посещение во избранных Его.

Премудрости Соломоновы чтение:

Праведницы во веки живут, и в Господе мзда их: и попечение их у Вышняго. Сего ради приимут царствие благолепия, и венец доброты от руки Господни: зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый преподобие. Поострит же напрасный гнев во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости исполнь падут грады. Вознегодует на них вода морская, реки же потопят я нагло. Сопротив станет им дух силы, и яко вихор развеет их, и опустошит всю землю беззаконие, и злодейство превратит престолы сильных. Слышите убо царие, и разумейте, навыкните судии концев земли. Внушите держащии множества, и гордящиися о народех языков, яко дана есть от Господа держава вам, и сила от Вышняго.

Притчей чтение:

Память праведнаго с похвалами, и благословение Господне на главе его. Блажен человек, иже обрете премудрость, и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных, все же честное недостойно ея есть. Долгота бо дней и лета живота в деснице ея, в шуйце же ея богатство и слава. От уст ея исходит правда, закон же и милость на языце носит. Послушайте убо Мене, о чада, честная бо реку: и блажен человек, иже пути Моя сохранит; исходи бо Мои, исходи живота, и уготовляется хотение от Господа. Сего ради молю вас и предлагаю Мой глас сыновом человеческим: яко Аз премудрость устроих, совет и разум, и смысл Аз призвах. Мой совет и утверждение, Мой разум, Моя же крепость. Аз мене любящия люблю, ищущии же Мене обрящут благодать. Разумейте убо, незлобивии, коварство, ненаказании же, прилагайте сердца. Послушайте Мене и паки, честная бо реку: и отверзу от устен правая, яко истине поучится гортань Мой, мерзски же предо Мною устны лживыя. С правдою вси глаголы уст Моих: ничтоже в них стропотно, ниже развращенно. Вся права суть разумевающим и проста обретающим разум. Научаю бо вас истине, да будет о Господе надежда ваша и исполнитеся Духа.

НА ЛИТИИ

Стихиры, глас 8. Подобен: Что вас наречем

Что тя наречем, святителю* Ангелом ли, яко о телеси небрегл еси?* Херувимом ли, яко на тебе Христос почил есть?* Серафимом, яко безпрестани славил еси Бога?* Силою ли, яко чудеса источаеши?* многа твоя имена,* и большая дарования;** моли спастися душам нашим.

Что тя наименуем, угодниче Христов* апостолом ли, яко многи ко истинней вере обратил еси?* мучеником ли, яко страдания претерпел еси?* преподобным ли, яко в подвизех Христа прославил еси?* блаженным ли, яко блаженныя жизни еще в страдании причастник был еси?* многа твоя имена,* и большая дарования;** моли спастися душам нашим.

Чим тя прославим, славне Афанасие* песньми ли, яко Христа воспел еси?* псалмы ли, яко псаломски чрез все житие твое жительствовал еси?* поклонением ли, яко и сам ты в истине и дусе Богови поклонялся еси?* славословлением ли, яко Бога выну славословил еси?* многа твоя имена,* и большая дарования;** моли спастися душам нашим.

Како тя воспоем, святче Божий* или како возъименуем тя?* Ты бо предстатель о земли Полтавстей* изряден явился еси,* и обителей твоих пастырь добрейший;* многа твоя имена,* и большая дарования;** моли спастися душам нашим.

Слава, глас тойже.

Терпеливодушнаго святителя* ныне сошедшеся воспоим* той бо имать дерзновение* о земли Полтавстей молитися,* обители же ея молитвами своими утверждати,* нам же всем от Господа испросити** мира и велия милости.

На стиховне: стихиры, глас 8. Подобен: Мученицы Твои, Господи

Святитель Твой, Господи* забы житейская* небреже и о поношениих* будущия ради жизни;* тоя наследник явися,* темже со ангелы радуется** того молитвами даруй людем Твоим велию милость.

Стих: Честна пред Господем смерть преподобных его

Угодник Твой, Христе Боже* отверже сладости мира,* небреже и о клевете,* небеснаго ради Царствия;* того причастник явися,* тамо с лики святых торжествует;** того молитвами сохрани, Боже, землю нашу Полтавскую.

Стих: Восхвалятся преподобнии во славе, и возрадуются на ложах своих

Страдалец вольный быв Бога ради* отвержеся о себе попечения,* небреже о славе земней,* Горняго Иерусалима ради;* темже и небесный гражданин явися,* и молится прилежно** о еже спастися душам нашим.

Слава, глас 1.

Мира никакоже волюбив,* горняго же возжелев издетска* святителю избранне,* от человек поношения прияв,* от Бога венец приемлеши;* Тому помолися, угодниче Христов,* и испроси душам нашим** мира и велия милости.

Тропарь, глас 4.

Многоскорбный угодниче Христов, святителю отче наш Афанасие, в житии своем крест тяжкий понесый и многия гонения и клеветы претерпевый, не остави нас, чад твоих, твоим предстательством, имаши бо дерзновение ко Господу молитися, о еже всякия скорби нам претерпети достойно, ко спасению душ наших

НА УТРЕНИ

По кафизме седален, глас 1.

Спаси, Христе, люди Твоя,* сошедшиеся днесь в память святаго,* и благослови наследие Твое;** за нас бо молится угодник Твой и заступник наш, Афанасий святитель избраннейший.

Ин седален, глас тойже.

Помяни, Спасе, обители Полтавския,* в нихже угодник Твой Афанасий подвизався,* в небесные обители отъиде,* отонудуже призирает на паству свою,* и молится Тебе прилежно** спастися душам нашим

Слава, и ныне: Богородичен, глас тойже

ПОЛИЕЛЕЙ

Величание святителю:

Величаем тя,* святителю отче наш Афанасие,* и чтем святую память твою,* ты бо молиши о нас** Христа Бога нашего

Во обителех же:

Величаем тя,* святителю отче наш Афанасие,* и почитаем скорби и болезни твоя,** о обители твоей теплый предстателю

Или:

Ублажаем тя,* многоскорбный святителю Афанасие,* и почитаем многотрудное житие твое,* ты бо дерзновение имаши молитися** о душах наших

По полиелеи седален, глас 3. Подобен: Дева днесь

Святитель Афанасий днесь предстоит Престолу Царя славы,* и вся земля ликовствует,* Ангелы с человецы согласно поют,* и пастыри с инокинями поклоняются;* за нас бо молит святитель** Превечнаго Бога.

Слава, и ныне. Богородичен, глас тойже.

Дева днесь покрываем покровом Своим святым верныя люди Своя, сошедшиеся в память многоскорбнаго и всерадостнаго святителя Афанасия.

Степенна, 1-й антифон 4-го гласа: От юности моея

Прокимен: Честна пред Господем смерть преподобных Его

Стих: Что воздам Господеви о всех, яже воздаде ми

Евангелие: Матфея, зач. 11 (Мф. 4.25–5.12)

Во время оно, по Иисусе идоша народи мнози от Галилеи и десяти град, и от Иерусалима и иудеи, и со онаго полу Иордана. Узрев же народы, взыде на гору: и седшу Ему, приступиша к Нему ученицы Его. И отверз уста Своя, учаше их, глаголя: блажени нищии духом: яко тех есть Царствие небесное. Блажени плачущии: яко тии утешатся. Блажени кротцыи: яко тии наследят землю. Блажени алчущии и жаждущии правды: яко тии насытятся. Блажени милостивии: яко тии помиловани будут. Блажени честии сердцем: яко тии Бога узрят. Блажени миротворцы: яко тии сынове Божии нарекутся. Блажени изгнани правды ради: яко тех есть Царствие небесное. Блажени есте, егда поносят вам, и ижденут, и рекут всяк зол глагол на вы лжуще, мене ради: радуйтеся и веселитеся, яко мзда ваша многа на небесех:

По Евангелии стихира, глас 6:

Верный рабе и пастырю добрый,* святителю отче Афанасие,* греху прежде смерти умерев,* к жизни вечней воскресл еси, святе,* скорби же и клеветы претерпев,* ныне скорбных и обидимых имаши власть утешати,* и ко Спасу молитися** помиловатися душам нашим

Канон, глас 2,

егоже краегранесие (тропари без ирмосов):

Безсмертия соименному святителю пою

Песнь 1

Ирмос: Грядите людие, поим песнь Христу Богу, раздельшему море, и наставльшему люди, яже изведе из работы египетския, яко прославися.

Боже премилостивый, даруй мне слово, да воспою угодника Твоего Афанасия; той бо, благочестно пожив, в Горняя преставился обители, и молится о всех, чтущих святую память его.

Еже по образу соблюдый невредимо, к Первообразному возшед, ныне зриши озлобление людей твоих; темже помози нам, милостиве Афанасие

Зиму страстей мира молитвою согрел еси, мрак же греха праведностию просветив, ныне торжествуеши на небеси, угодниче славный Христов, Афанасие

Богородичен:

Славная Дево и Пренепорочная, моли Сына Твоего и Бога нашего спастися душам нашим.

Катавасиа: Глубины открыл есть дно…

Песнь 3

Ирмос: Утверди нас в Тебе Господи, древом умерщвлей грех, и страх Твой всади в сердца нас поющих Тя.

Милостивый святителю и добрый рабе Христов, умоли Милостиваго, да прегрешений оставление подаст душам нашим.

Елеем милости Христовой утолив скорби твоя, славне, и ныне тойже елей изливаеши всякому страждущему, от сердца поющему тя.

Радости Божественныя и нас исполни, святителю, от Источника радости присно бо черплеши, и прохлаждаеши скорби поющих тя.

Богородичен:

Твердому в вере, истинному же в словесех Афанасию Пресвятая Богородица новый смысл подаде, ветхий же разум обнови, яко да воспоет Сына Ея прилежно.

Седален, глас 4. Подобен: Вознесыйся на крест волею

Восшед волею на крест терпения, воскресл еси к жизни лучшей, соименный бо воскресению, Афанасие, быв, сие в житии твоем показав, имый Христа непобедимую победу.

Богородичен, глас тойже.

Пресвятая и всечистая Дево, Мати Господа небесе и земли, со святителем моли о нас Безсмертнаго Бога.

Песнь 4

Ирмос: Услышах Господи, слух Твоего смотрения, и прославих Тя, едине Человеколюбче.

Имеяй велие упование на Господа, тое никакоже посрамил еси, Афанасие премудре, тако бо все житие скончав, единаго токмо возжелел еси, яко да прославити Единаго Человеколюбца

Явися яко солнце житие твое, святе, светом же сего просвещаеми, и теплотою согреваеми, прославляем Христа, Солнце правды и Единаго Человеколюбца.

Страждущим и обидимым ныне предстатель явился еси, преблаженне: сам бо пострадав, имаши власть и дерзновение молити о обидимых Единаго Чловеколюбца.

Богородичен:

Отвратити гнев Божий, Богородице, грех ради наших на ны находящий, молитвами святителя Афанасия, умоли, Дево, Господа единаго Человеколюбца.

Песнь 5

Ирмос: Света Подателю, и веков Творче Господи, во свете Твоих повелений настави нас: разве бо Тебе иного Бога не знаем.

Изведи из темницы грехов страждущую душу мою, Афанасие отче милостивый, и воскреси ю, умершую грехом, воскресению бо соименный.

Милостиваго Творца милости изливаеши обильно всем, мощем твоим православно кланяющимся, и Господа сердцем и усты исповедающим.

Езекииных слез и покаяния Давидова не имам, Господи, обаче приношу ти молитвы угодника Твоего Афанасия, той бо имать дерзновение молитися о нас к Тебе; разве бо Тебе иного бога не знаем.

Богородичен:

Небесная царице, ангелы воспеваемая и от всех земнородных покланяемая, приими недостойную молитву нашу, и принеси ю Сыну Твоему, да спасет души наша.

Песнь 6

Ирмос: Бездна мя многа греховная окружает, и вопию Ти, пророка подражаяй: от тли мя Господи возведи.

Не ктому страждеши, ниже болезнуеши, отче Афанасие, обаче в радости пребываеши, темже молитвами твоими и нас от тли страстей свободи

Обыде мя бездна, страсти же моя яко волны погружают корабль души моея; но ты, святе, молитвами твоими от сих мя избави

Моря греховнаго избегнув, к тихому пристанищу притекл еси, отче, темже и всем яко звезда путеводная являешися ко пристанищу небесному

Богородичен:

Умершаго мя грехом оживи благодатию Сына Твоего, Дево Мати, приносим бо Тебе наша молитвы яко дар, иного бо не имамы упования по Бозе, токмо Тебе, Милостивая

Кондак, глас 8

Избранный от юности угодниче Христов,* славу мира нивочтоже вменивый и Господу последствовати возжелевый,* темже поношения и гонения паче хвалы вменил еси,* и даже до смерти о Церкви Святей болезновал еси,* сего ради зовем ти умильно:* Радуйся, многоскорбный святителю Афанасие,* радости небесныя причастниче.

Икос: Ангелов собеседника и земным скораго помощника воспети дерзаю, грешный аз. Ты же, отче святый, Афанасие великоимените, не отвергни теплую молитву сердца моего, но яко и в прежняя лета скорбящим и недужным помогал еси, тако и ныне услыши мене, смиреннаго, поющаго ти сице: Радуйся, даре Божий нарочитый; радуйся, безсмертия соименитый. Радуйся, смиреннейший на земли; радуйся, превознесенный на небеси. Радуйся, молитвы грешников приемляй; радуйся, никогдаже просящих отреваяй. Радуйся, красото Церкве изрядная; радуйся, утверждение Православия крепкое. Радуйся, многоскорбный святителю Афанасие, радости небесныя причастниче.

Ин икос: Истины служителя безсмертию соименнаго похвалим Афанасия, сей бо есть скорый помощник и услышатель всякому, тако его поющему: Радуйся, помощниче наш верный; радуйся, молитвенниче о нас усердный. Радуйся, в беде сущих покровителю; радуйся, скорбящих возвеселителю. Радуйся, согреяние душ хладных; радуйся, радосте душ праведных. Радуйся, многоскорбный святителю Афанасие, радости небесныя причастниче.

Песнь 7

Ирмос: Образу златому на поле деире служиму, трие Твои отроцы небрегоша безбожнаго веления: посреде же огня ввержени, орошаеми пояху: благословен еси Боже отец наших.

Святитель непорочный быв, слово истины Христовой верно правив, ныне венчаешися от Пастыреначальника и Бога отец наших.

Воин Христов на неверныя ополчаяйся был еси, темже и воинствующим противу плоти, мира и диавола помощник являешися, подаваяй силу и крепость от Бога отец наших.

Язвы души моея уврачуй, Господи, молитвами угодника твоего Афанасия; той бо молит присно о всех нас Бога отец наших.

Богородичен:

Твоих песнословцев не отвержи, Пречистая, в молитвах к тебе святителя Афанасия приводящих, и просящих от Господа многих грехов прощения.

Песнь 8

Ирмос: Неизреченною мудростию составльшаго всяческая Бога Слова, и от не сущих во еже быти Приведшаго, благословите дела яко Господа, и превозносите во вся веки.

Имый влечение к Богу, от земнаго неудержан пребыл еси, темже к Богу возводиши, чтущих святую память твою, и превозносящих Господа во веки.

Творец и Избавитель твой, Афанасие, сотвори тя якоже адамант противу искушений, и избави тя от скверн мира; темже и воспеваеши Господа, превозносяще его во веки.

Единому Богу поработав, славы людския никакоже взыскав, прославлен ныне от Господа, святителю отче наш Афанасие. Темже имаши власть молитися, да и мы всем сердцем Господу Единому прилепимся, превозносяще Его во веки.

Богородичен:

Льстивый и наветник клевету на святителя кроткаго воздвиже, обаче ничтоже успе: Богородитца бо вся козни лукаваго разори, святителя же утеши, выну бо той взываше: благословите Господа, и превозносите во вся веки.

Песнь 9

Ирмос: Яже прежде солнца светильника Бога возсиявшаго, плотски к нам пришедшаго из боку Девичу, неизреченно воплотившая, Благословенная Всечистая: Тя Богородице величаем.

Южныя страны и северныя тебе хвалу приносят, отче, людие же вси верно почитают память твою. Ты бо светильник явился еси мирови пресветлый, и Господа прославив в житии твоем, ныне от Него на небесех прославляешися.

Припадают к раце мощей твоих архиереев сонм, священников же сословие; иноков же и инокинь лица торжествуют, имущии таковаго молитвенника и заступника пред Господом

Отдаю тебе пение сие, яко долг некий, обаче ничтоже достойно твоих дарований принесох ти, отче милостивый. Токмо молю тя, Афанасие, безсмертия вожделеннаго сподоби и мя, последняго от молитвенник твоих.

Богородичен:

Юница нескверная, рождшая Закланнаго за спасение мира, Того со святителем Афанасием моли, да спасет души наша.

Светилен. Подобен: Небо звездами

Небо звездами украсивый яко Бог, и Твоими святыми всю землю просветивый, Содетелю всех, поющия Тя спасай.

Богородичен:

Богородице, упование христианом, со всеми святыми поющия Тя избави от всех мук.

На хвалитех стихиры, глас 1. Подобен: небесных чинов

Небесных чинов совсельниче,* человеком же на земли предстателю,* отче наш Афанасие,* умоли о нас, тебе почитающих,* яко на дивнаго во святых Господа** все упование наше возлагаем.

Небесных ликов равночестне,* земных никакоже оставляеши* молитвами твоими, святе,* землю Полтавскую покрываеши,* и о обителех наших ходатайствуеши,** на Господа упование верное возложивших

Небесных сил сожителю,* и Господа верный служителю,* Афанасие богомудре,* умоли Милостиваго,* да милостив будет всем нам,** на Него упование едино возложивших.

Небесныя радости причастниче,* тоя причастницы и нас сотвори* предстательством твоим, блаженне,* и к жизни вечней настави нас,* поющих святую память твою;** и на Творца упование твердое возложивших.

Слава, глас тойже. Подобен: О, дивное чудо

О, дивное чудо,* источник исцелений источают нам* всечестныя мощи святителя Афанасия.* Веселися, граде Полтаво,* радуйтеся, обители иноческия,* ликуйте, вернии:* не остави бо нас своим предстательством* угодник Христов и страдалец,* на земли скорбный иногда* и на небеси ныне ликовствующий** и просящий всем нам от Господа великия милости.

Славословие, тропари и отпуст

НА ЛИТУРГИИ

Прокимен, глас 7: Возвеселится праведник о Господе, и уповает на Него

Стих: Свет возсия праведнику, и правым сердцем веселие

Апостол: Иак. 50 (Иак. 1. 1–18)

Иаков, Богу и Господу Иисусу Христу раб, обеманадесяте коленома, иже в разсеянии, радоватися. Всяку радость имейте, братие моя, егда во искушения впадаете различна, ведяще, яко искушение вашея веры соделовает терпение: терпение же дело совершенно да имать, яко да будете совершенни и всецели, ни в чемже лишени. Аще же кто от вас лишен есть премудрости, да просит от дающаго Бога всем нелицеприемне и не поношающаго, и дастся ему. Да просит же верою, ничтоже сумняся: сумняйся бо уподобися волнению морскому, ветры возметаему и развеваему. Да не мнит бо человек он, яко приимет что от Бога. Муж двоедушен неустроен во всех путех своих. Да хвалится же брат смиренный в высоте своей, богатый же во смирении своем, зане якоже цвет травный мимоидет: возсия бо солнце со зноем, и изсуши траву, и цвет ея отпаде, и благолепие лица ея погибе: сице и богатый в хождении своем увядает. Блажен муж, иже претерпит искушение: зане искусен быв, приимет венец жизни, егоже обеща Бог любящым Его. Никтоже искушаемь да глаголет, яко от Бога искушаемь есмь: Бог бо несть искуситель злым, не искушает же Той никогоже, кийждо же искушается, от своея похоти влекомь и прельщаемь: таже похоть заченши раждает грех, грех же содеян раждает смерть. Не льститеся, братие моя возлюбленная: всяко даяние благо и всяк дар совершен свыше есть, сходяй от Отца светов, у негоже несть пременение, или преложения стень. Восхотев бо породи нас словом истины, во еже быти нам начаток некий созданием его.

Аллилуиа, глас 8

Стих: Веселитеся о Господе, и радуйтеся, праведнии

Стих: Восхвалятся преподобнии во славе, и возрадуются на ложах своих

Евангелие: Матфея, зач. 43 (Мф. 11. 27–30)

Рече Господь Своим учеником: Вся Мне предана суть Отцем моим: и никтоже знает Сына, токмо Отец: ни Отца кто знает, токмо Сын, и емуже аще волит Сын открыти. Приидите ко Мне вси труждающиися и обремененнии, и Аз упокою вы: возмите иго Мое на себе и научитеся от Мене, яко кроток Есмь и смирен сердцем: и обрящете покой душам вашым: иго бо Мое благо, и бремя Мое легко есть.

Причастен: В память вечную будет праведник, от слуха зла не убоится.


АКАФИСТ

святителю Полтавскому Афанасию

Кондак 1

Избранный от юности угодниче Христов, славу мира нивочтоже вменивый и Господу последствовати возжелевый, темже поношения и гонения паче хвалы вменил еси, и даже до смерти о Церкви Святей болезновал еси, сего ради зовем ти умильно:

Радуйся, многоскорбный святителю Афанасие, радости небесныя причастниче.

Икос 1

Ангелов собеседника и земным скораго помощника воспети дерзаю, грешный аз. Ты же, отче святый, Афанасие великоимените, не отвергни теплую молитву сердца моего, но яко и в прежняя лета скорбящим и недужным помогал еси, тако и ныне услыши мене, смиреннаго, поющаго ти сице:

Радуйся, даре Божий нарочитый; радуйся, безсмертия соименитый.

Радуйся, смиреннейший на земли; радуйся, превознесенный на небеси.

Радуйся, молитвы грешников приемляй; радуйся, никогдаже просящих отреваяй.

Радуйся, красото Церкве изрядная; радуйся, утверждение Православия крепкое.

Радуйся, многоскорбный святителю Афанасие, радости небесныя причастниче.

Кондак 2

Видяй от млада благия примеры жития христианскаго, возгорелся еси сердцем, да Христу поработаеши во всем житии твоем, поя Ему в радости: Аллилуиа.

Икос 2

Разум Божественный имети возжелев, вдался еси во учение книжное. Постигая же от премудрости Евангельския, абие высекал если мудрости словеса на скрижалех сердца твоего; темже и слышиши от нас:

Радуйся, усердный слушателю Божественных учений; радуйся, тем избегший вечных мучений.

Радуйся, уставов отеческих послушателю смиренный; радуйся, за смирение твое Богом превознесенный.

Радуйся, в вертограде Христовом неленостно трудивыйся; радуйся, руце на рало положивый, николиже вспять обративыйся.

Радуйся, огнь искушений приявый радостно; радуйся, прохладу Небеснаго Царствия вкушаяй сладостно.

Радуйся, многоскорбный святителю Афанасие, радости небесныя причастниче.

Кондак 3

Силою свыше во священстве облеченный, дерзновенно пред всеми исповедал еси Христа распята, Емуже во вся дни жизни Твоея с веселием сердца воспевал еси: Аллилуиа.

Икос 3

Имущи попечение о Церкви Святей, всего себе предал еси на служение ближним, обители устрояя и спасения всем всячески ища. Сего ради, подвигом твоим дивящеся, взываем ти:

Радуйся, иноческия обеты радостно принесый; радуйся, паству Христову добре упасый.

Радуйся, пастырь добрый иноком бывый; радуйся, всякаго сердечно возлюбивый.

Радуйся, обителей усерднейший строителю; радуйся, иноков изряднейший правителю.

Радуйся, ликом небесным сопричтенный; радуйся, яко злато в горниле искушенный.

Радуйся, многоскорбный святителю Афанасие, радости небесныя причастниче.

Кондак 4

Бури житейския и треволнения мирския яко не сущая восприял еси, темже и в подвизех иноческаго жития быв, послежде же и архиерейства сподобився, к горним очи возводил еси всегда, смиренно Богови поя: Аллилуиа.

Икос 4

Слышав святитель Афанасий бедствия народа Божия, лестию от Церкве Православныя отторгнутаго, возревнова о спасении заблудших. Темже и многих обратил еси ко истинней вере, яко да и тем вопити прилежно:

Радуйся, истиннаго единства Церкве ревнителю; радуйся, заблуждших усерднейший просветителю.

Радуйся, неверия обличителю златословесный; радуйся, веры возвестителю известный.

Радуйся, неверным Евангельским гласом вещаяй; радуйся, златыя словеса верным испущаяй.

Радуйся, с любовию руце к заблуждшим простираяй; радуйся, от ереси, неверия и раскола отвращаяй

Радуйся, многоскорбный святителю Афанасие, радости небесныя причастниче.

Кондак 5

Боготечною звездою шествовал еси, отче, иго благое несый, на всяком месте яко странник быв, в сердце своем Горнее отечество имеяй, и тамо ныне водворяяся, со ангелы и лики святых воспеваеши: Аллилуиа.

Икос 5

Видеша ближнии и дальнии, како ты, отче блаженный, в смирении и кротости иго Христово несеши, и возрадовашася, таковый образ терпения и злострадания вольнаго имуще; сего ради и воспевают ти похвальная:

Радуйся, града Полтавы доброе прозябение; радуйся, града Твери благое воспитание.

Радуйся, Великаго Нова града украшение; радуйся, града Петрова красото.

Радуйся, града Могилева крепосте; радуйся, всякаго града и места сладосте.

Радуйся, обители Мгарския покровителю; радуйся, обители Полтавския охранителю.

Радуйся, многоскорбный святителю Афанасие, радости небесныя причастниче.

Кондак 6

Проповедником истины быв, никакоже неправды убоялся еси, обаче о Церкви Святей болезновав, волею смирил еси себе, никоеяже славы взыскуя, токмо бы никтоже тебе ради да не преткнется, ниже да возбраниши кому пети: Аллилуиа.

Икос 6

Возсия житие твое, яко солнце, и яко звезда на тверди церковней в нощи скорбей, сего ради люди Божии умильно взывают ти умильно:

Радуйся, апостолом в проповедании равный; радуйся, с богоглаголивыми пророками славимый.

Радуйся, с мучениками ликовствуяй; радуйся, со исповедники торжествуяй.

Радуйся, преподобных соревнователю; радуйся, праведных подражателю.

Радуйся, святителей удобрение; радуйся, всех добродетелей соединение.

Радуйся, многоскорбный святителю Афанасие, радости небесныя причастниче.

Кондак 7

Хотящу Христу бóльшая тебе благая даровати, и чрез огнь искушения на небеса возвести, ничтоже вопреки глаголал еси, Афанасие богомудрый. Темже и искушен быв, искушаемым имаши власть помогати, да спасеннии от бед, всегда воспевают благих Подателю Богу: Аллилуиа.

Икос 7

Новаго смысла взыскав, ветхий разум всяко отложил еси, и, к горним устремляя помыслы, дольняя же возненавидев, в смирении и бесславии конец жития твоего скончал еси. Преселився же в горняя, тамо слышиши пение ангельское, от человек же приносимыя тебе обрадования таковыя:

Радуйся, образе от мира отречения; радуйся, красото крайняго смирения.

Радуйся, скорби радостно претерпевый; радуйся, болезни в веселии понесый.

Радуйся, безумия мира обличителю; радуйся, красоты душевныя усердный хранителю.

Радуйся, ветхаго человека отвергийся; радуйся, во Христа оболкийся.

Радуйся, многоскорбный святителю Афанасие, радости небесныя причастниче.

Кондак 8

Странник и пришлец быв на земли, в горняя вселился еси, блаженне страдальче, и ныне пребываеши, идеже несть болезнь, ни печаль, ни воздыхание, но бесконечная и вечная жизнь, и пение всеумиленное Господеви Жизнодавцу: Аллилуиа.

Икос 8

Весь любовию ко Господу пламенеяй, стужи страданий и хлада греховнаго не убоялся еси. Ведый бо, яко во благое вся творит Христос любящим Его, и нас научаеши видети благую и совершенную волю Божию; мы же тебе, нашему учителю и заступнику, песненно поем со апостолом:

Радуйся, яко скорбь тя от любви Христовой не отлучи; радуйся, яко теснота тя любити Христа научи.

Радуйся, яко гонение любви твоей не умали; радуйся, яко беда паче огнь любве в тебе распали.

Радуйся, яко меч клеветы тебе пройде душу; радуйся, яко препобедил еси настоящая и грядущая.

Радуйся, небесная блага возлюбивый; радуйся, всегда в любви Христовой пребывый.

Радуйся, многоскорбный святителю Афанасие, радости небесныя причастниче.

Кондак 9

Всякия поношения претерпел еси, отче наш Афанасие, клеветы же и укроения неправедныя. Обаче в клети сердца твоего затворився, и врагов твоих простив, во смирении Господеви воспевал еси: Аллилуиа.

Икос 9

Ветия сладкогласный и пастырь добрый был еси, отче, еще же и инок ревностный и молитвенник преизрядный. Сего ради мы, паства твоя, поем ти:

Радуйся, овчате заблуждшаго взыскателю; радуйся, богомудрый паствы наказателю.

Радуйся, добре пасый паству словесную; радуйся, всякаго приведый на пажить небесную.

Радуйся, яко глас твой овцам известен; радуйся, яко образ твой пред Богом многочестен.

Радуйся, яко пищу даруеши нам пищу чудесную; радуйся, яко надежду нам подаеши непрелестную.

Радуйся, многоскорбный святителю Афанасие, радости небесныя причастниче.

Кондак 10

Спасти хотяй душу обидящаго тя, ничтоже вопреки глаголал еси, Христови подражаяй, и за обидящаго молился еси. Мы же, таковое твое смиренномудрие зряще, похваляем тя, Подвигоположнику Христу поюще: Аллилуиа.

Икос 10

Стена храма соборнаго сокры до времени святыя мощи твоя, обаче во время благопотребно архипастырь же и пастыри, с сестрами обители Крестовоздвиженския, обретоша мощи твоя; ихже лобзающе, воспеша ти сладце:

Радуйся, сокровище обители твоей даровавый; радуйся, мощи твоя от безбожных премудре сокрывый.

Радуйся, архиереев возвеселивый; радуйся, инокинь обрадовавый.

Радуйся, хулители посрамивый; радуйся, вся верныя просветивый.

Радуйся, правды Божией блюстителю; радуйся, истины Христовой ревнителю.

Радуйся, многоскорбный святителю Афанасие, радости небесныя причастниче.

Кондак 11

Пение воспевают ти архиереев лицы, инокини же покланяются, и мирстии умиляются, и всякий род и звание приемлет от святых мощей твоих благодатныя вспоможения, воспевают же вси Творцу и Избавителю Богу: Аллилуиа.

Икос 11

Света податель Господь просвети тебе еще в житии твоем, темже и по смерти твоей подает исцеления всем, притекающим к четным мощем твоим, и тако вопиющим:

Радуйся, руце простирающим к мощем твоим исцеляяй; радуйся, нозе, на поклонения текущия, абие здравы сотворяяй.

Радуйся, от страсти винопития отвращаяй; радуйся, к любви Христовой грешников приводяй.

Радуйся, от неправедныя клеветы избавляяй; радуйся, скорбных скоро утешаяй.

Радуйся, скорых услышателю в нуждах сущих; радуйся, благий помощниче тебе чтущих.

Радуйся, многоскорбный святителю Афанасие, радости небесныя причастниче.

Кондак 12

Благодать восприемлем вси, мощем твоим прикасающиеся, и иконе твоей покланяющиеся. Дарова бо нам преизобильный источник исцелений и чудес Господь, Емуже поем всегда: Аллилуиа.

Икос 12

Поюще тя песненно, восхваляем дивнаго во святых Своих Господа, Иже дарова нам сокровище духовное, мощи твоя святыя, тебе же предстателя и молитвенника воздвиже Господь на утешение и ободрение людем Своим. Мы же, толицей милости благодарни суще, воспевати дерзаем:

Радуйся, в бедах утешение; радуйся, в скорбех ободрение.

Радуйся, духовное христиан веселие; радуйся, тихое верных радование.

Радуйся, от бед всяческих верное избавление; радуйся, неверным и сумнящимся вразумление.

Радуйся, людей верных просвещение; радуйся, Полтавы крепкое охранение.

Радуйся, многоскорбный святителю Афанасие, радости небесныя причастниче.

Кондак 13

О, многоскорбный святителю Афанасие, в житии крест тяжкий неправедных гонений и клеветы понесый! Испроси нам у Господа всякия скорби претерпети, токмо да Его, Сладчайшаго, не отвратитися, и путем спасения верно шествуем, с тобою же и всеми святыми поя Христу